1. Biografia
São Titus Brandsma moris ho naran Anno Sjoerd Brandsma iha loron 23 fulan Fevereiru tinan 1881 iha Oegeklorster, Provínsia Friesland, Olanda. Nia mai hosi família Katólika ne'ebé devotu. Anno maka oan ida hosi oan na'in-neen no na'in-lima hosi sira tama iha vida relijioza. Anno mai hosi família agrikultór ida ne'ebé maka iha influénsia tebes entre komunidade Katólika iha área ne'ebá.
Ho tinan 11 nia tama iha semináriu menór Orden Fransiskana nian. Nia isin ki'ik no hetan apelidu "the midget" hosi nia belun sira. Maski nia saúde ladún di'ak, nia vontade maka'as tebes no nia sempre kontente. Desde ki’ik nia aprende atu sakrifisiu nia an iha terus, lori krús terus nian iha nia isin atu moris fiel ba fiar kristaun nian.
Ho tinan 17 nia tama iha Orden Karmelita iha tinan 1898, hodi foti naran Titus. Nia hili naran ida-ne'e tanba nia hakarak atu relembra nafatin nia aman Titus nia naran. Aleinde ida-ne’e, nia hakarak kore-an hosi mundu tuan ka buat mundu nian no mós hakarak haluha nia pasadu iha-ne’ebé uluk (bainhira sei iha semináriu) nia hakarak tama iha Orden Fransiskanu maibé nia saúde la permite. No buat ne’ebé importante liu mak naran Tito ne’e loloos naran husi dixípulu Apóstolu Paulo nian.
Bainhira nia sei estudante, nia hatudu nia talentu iha hakerek no jornalizmu hodi publika nia livru dahuluk, kolesaun ida hosi hakerek sira ne'ebé di'ak liu hosi Santa Teresa Avilla. Nia mós estuda obra sira hosi eskritór karmelita sira uluk nian no aprende oinsá atu hakerek no oinsá atu haklaken kona-ba espiritualidade karmelita nian
Nia simu ordenasaun nu'udar amlulik iha loron 17 fulan-Juñu tinan 1905 iha Katedrál Hertogenboch. Depois kontinua nia estudu sira seluk (pós-graduasaun) iha St. Mary's College. Alberto, Roma. Wainhira hala’o nia estudu dalabarak nia hetan moras maibé nia konsege hetan grau Doutoramentu iha Universidade Gregoriana, Roma. Hafoin ida-ne'e nia fila fali ba Olanda no hanorin seminarista Karmelita sira iha Oss.
Nia fóka atensaun boot ba Universidade Katólika, asosiasaun jornalista Katólika sira no apostoladu ba reunifikasaun Igreja Orientál nian tanba nia espíritu ekuméniku boot no atu atrai simpatia hasoru nazi sira. Nia iha karizma boot hodi harii Universidade Katólika iha Nijmegen iha tinan 1923. Hafoin ne'e nia harii konventu Karmelita ne'ebé besik ho Universidade nia fatin iha tinan 1929, no mosteiru ne'e sai nia rezidénsia to'o tinan 1942. Nia sai profesór durante tinan 19. Ba ninia dedikasaun ne’ebé la kole atu luta ba Universidade Katólika, nia hetan nomeasaun ho aklamasaun atu sai Xanxeler iha tinan 1932. Ho pozisaun ida-ne’e nia sai koñesidu liután iha Olanda, no nia tenke bá Roma hodi fó relatóriu ba Amu-Papa Pio XI kona-ba kondisaun akadémika ninia universidade nian. Nia mós halo viajen ba rai-li'ur iha España, Irlanda, Alemaña no Estadus Unidus. Lakleur depois fila husi Estadus Unidus iha tinan 1935, realizmu husi Nazi sira (Adolf Hitler) sai maka'as liután. Iha tinan 1940/1941 Nazi sira tama iha Olanda. Tito kontra maka’as ideolojia ne’e, tantu iha mosteiru, iha universidade, no iha púlpitu igreja nian.
Iha tinan 1941 Nazi sira fó sai regulamentu ida katak padre no madre sira labele serbí nuʼudar administradór eskola nian ka diretór universidade nian tanba sira taʼuk sira sei sai opozitór ba esforsu propaganda Nazi nian. Amu-Bispu De Jong, nomeadamente Amu-Bispu Utrecht nian, husu ba Titus atu kontra esforsu Nazi nian ne’ebe atu halakon edukasaun Katólika iha Olanda.
2. São Titus Brandsma nia luta liu husi imprensa
Titus Brandsma nomeia husi Bispu Msgr. Dr. J. de Jong sai nu’udar matadalan espirituál ba jornalista katóliku sira tanba nia iha interese boot ba área ida-ne’e, nune’e mós iha esperiénsia konkreta no tanba ida-ne’e nia koñese diretór no editór jornál katóliku barak iha nia rain. Igreja Katólika Olanda nian forte tanba kuaze metade hosi populasaun maka Katólika. Sira iha estasaun rádiu ida. Titus Bandsma uza media ida ne’e hodi enkoraja sarani Katóliku sira hodi luta hasoru ideolojia Nazi iha tempu ne’ebá.
Bainhira iha Hitler nia ukun koloniál tama no kaer kontrolu iha nasaun Olanda, Titus Brandsma nia moris kontinua sai alvu nu'udar fujitivu hosi servisu sekretu Alemaña nian. Nia, ne'ebé hetan apelidu monge ki'ik perigozu, kontinua hetan perseguisaun tanba nia hakerek sira. Titus Brandsma hakerek ho ativu iha jornál sira ne'ebé koko atu luta ba liberdade imprensa Katólika nian no rekuza atu publika materiál propaganda Nasionál-Sosialista ne'ebé realistiku. Luta ida ne’e sai real liu ho esforsu atu lansa opozisaun nakloke hasoru ideolojia kolonialista.
Bainhira Nazi sira haruka jornalista sira iha fatin hotu-hotu atu simu publisidade sira ne'ebé maka natureza Nazi nian no ne'ebé kontra fiar relijiozu sira, bispu sira bolu Padre Titus no fó knaar ba nia atu hakbesik ba editór no diretór ida-idak hosi jornál katóliku sira hodi hato'o bispu sira nia mensajen. Se sira kontinua simu no tau publisidade sira hanesan Nazi sira hakarak, entaun sira labele konsidera hanesan jornál Katóliku. Ho liafuan badak: Para publikasaun! Kna’ar ne’e Padre Titus simu ho risku tomak. Nia la’o hale’u nasaun tomak iha loron balun de’it atu hato’o bispu sira-nia mensajen, no diskute asuntu ne’e ho editór jornál sira iha sidade ida tuir ida seluk, la kolen.
Padre Titus hakerek karta ida lori bispu sira hotu nia naran iha Olanda ba editór sira hotu jornál katóliku nian hodi dehan katak regulamentu ne’e la’o dook liu ona. Nu’udar konselleiru espirituál ba asosiasaun jornalista Katólika, nia husu atu sira hamriik metin no labele halo tuir Nazi nia ideologia sira. Nia hakerek kona-ba jornál katóliku sira ho termu forte liu, "Editór sira tenke rejeita kategorikamente artigu sira-ne'e, se sira valoriza karakter katóliku sira-nia jornál nian. Laiha posibilidade ba atitude seluk ruma. Ita to'o ona limite. Ha'u iha konfiansa katak jornál katóliku sira sei kontinua defende perspetiva katólika nian lahó dúvida kuandu ita-nia rezisténsia maka'as liután, ita sei laran-rua liután." kontra atake sira-ne'e."
Razaun tansá Titus Brandsma involve iha mundu imprensa tanba:
- Nazi sira hasai regulamentu ida iha tinan 1941 katak padre no madre sira labele sai diretór ka diretóra ba eskola ka universidade ruma.
- Kontra materializmu Nazi nian ne’ebe laos bazeia ba fiar kristaun.
- Rejeita publikasaun propaganda sira Nazi nian.
- Nazi sira hakarak atu desmantela organizasaun Katólika sira no liuliu hadau eskola sira no Imprensa Katólika.
- Hatur Imprensa Katólika iha influénsia maka’as iha sosiedade.
Ezisténsia imprensa iha Titus Brandsma nia tempu fó influénsia boot tebes ba ema nia moris. Influensia husi imprensa katolika iha Olanda makas tebes. Ida-ne'e hotu tanba esforsu maka'as hosi Padre Titus Brandsma hodi konvense Imprensa Katólika atu mantein iha nia pozisaun, nomeadamente kontra Nazi sira. Ida-ne'e hetan aseitasaun hosi ema sira ne'ebé fiar katak ho Nazi sira interese loloos povu nian maka joga ho ne'ebé halo povu Olandés hirus, sira prontu atu fó sira nia moris tanba sira nia konfisaun fiar nian iha ne'ebé konfisaun ne'e sei hetan supresaun. Prova katak públiku hetan influensia husi imprensa, katak sira lee Titus Bandsma nia hakerek sira ne'ebé kontra ideolojia Nazi. Maibé, eskritóriu funsaun públika nian rejeita Titus Brandsma nia influénsia no apoia ka kolabora ho ideologia Nazi nian.
3. Dalan ba Martíriu
Iha tinan 1939, Titus Bandsma sempre fó palestra kada semana kona-ba impaktu ideolojia Nazi nian iha Universidade Nijmegen. Nia ko'alia hodi kontra hasoru ideálismo sira Nazi nian iha enkontru públiku sira hodi denunsia persegisaun ba ema Judeu sira. Ida-ne'e hamosu ódiu ho hirus ne'ebé makas husi edeptus Nazi sira. Loos duni, nia koñesidu tebes ba kuadru informasaun ba Imprensa Olandeza, servisu notísia Nazi nian ne'ebé nia hanaran hanesan diseminadór. Titus mós foti asaun makaas hasoru profesór alemaun ne'ebé deklara nia-an nu'udar Nazi katak nia la pertense ona ba Universidade Katólika Nijmegen nian, hodi dehan, "Di'ak. Ema haree ó hanesan traidór ida."
Mestre boot ida seluk fó sasin kona-ba Titus Bandsma katak nia ema ida ne'ebé aten-barani no nia asaun sira konvense sira ne’ebe rona no le’e nia obra sira. Serteza katak sasin konvensivu hotu-hotu sei iha konsekuénsia tanba traidór sira sei la nonook. Entaun antes invazaun ba Olanda, Titus tama ona iha lista metan. Tan neʼe, iha loron 19 Janeiru 1942, ema kaer Titus. Nia tama iha prizaun estadu nian iha Scheveningeen, iha ne'ebé nia hetan interogasaun durante semana hitu hosi ema sira ne'ebé kaer nia. Hafoin semana hitu iha Scheveningeen, soldadu sira lori nia ba kampu konsentrasaun iha Amersfoort.
Durante semana sira interogasaun nian nia mantein nia kondenasaun ba ideolojia Nazi nian. Tuirmai nia hetan konvokasaun ba líder Nazi sira ne'ebé hakarak nia atu asina dokumentu ida ne'ebé hateten katak nia sei la haklaken tan ka kontinua nia rezisténsia hasoru okupante sira nia rain nian. Ema hateten ba nia katak se nia asina ida-ne'e nia sei hetan liberdade no se nia rekuza nia sei haruka ba Dachau, no ida-ne'e sei signifika mate maka dalan ikus ba nia: forma ida ezekusaun nian. Titus kontra nafatin ideolohia Nazi sira nian. Nu'udar rezultadu nia haruka ba Dachau iha ne'ebé nia moris durante semana lima. Bainhira nia iha Dachau, nia hetan torturasaun, hetan kanek no terus barak tebes. Ikusmai, Titus Brandsma tau iha laboratóriu ida hodi halo esperimentu segredu sira ho objetivu atu kura nia kanek sira. Maibé Titus Brandsma hatene katak iha ne'ebá maka nia moris sei remata. Nia mate iha ne'ebá iha loron 26 fulan-Jullu tinan 1942 hafoin hetan injesaun ho líkidu venenozu ida.
Iha ninia moris tomak, Titus Brandsma mantein ninia fiar kristaun hodi kontinua haklaken. Nu’udar amlulik nia la ta’uk atu haklaken Maromak nia domin no lia-loos. Maski iha prizaun, nia sai sasin ba Kristu hodi fahe Santíssimu Sakramentu ho dadur sira seluk hodi tau uma-na'in sira iha nia kaixa vizeira nian. Loron ida bainhira nia lori hela sakramentu nia hetan tuda hosi guarda ida ne'ebé tuda nia monu ba rai no tebe nia, maibé nia kontinua haklaken, fó palestra, no hakerek iha jornál sira hodi kondena ideolojia Nazi nian. Titus Brandsma fó hanoin ba públiku kona-ba fiar no piedade bei'ala sira nian. Kona-ba bei'ala sira nia hakerek: "tantu protestante sira no katóliku sira iha istória tomak fó onra ba mártir barak ne'ebé sira haree nu'udar ezemplu - bainhira nesesáriu mós atu fó sira nia moris ba kauza sira nia fiar nian iha ne'ebé profisaun ne'e sei hetan supresaun."
4. Titus Brandsma Mártir Sékulu Modernu nian
Foin daudauk iha opiniaun ida katak reklamasaun sai Beata ka Santu la iha ona nia tempu. Maibé, iha Olanda ohin loron iha ema lubun ida ne’ebé, iha atmosfera moris hamutuk nian, koko nafatin atu mantein estabelesimentu kapela ida hodi komemora Padre Tito; menus liu tentativa atu deklara nia nu'udar ema ne'ebé hetan bensaun no santu. Esforsu sira-ne'e hetan aprovasaun hosi dioseze sira iha Olanda no Alemaña. Buat sira-ne’e hotu akontese la’ós tanba impulsu piadozu ka tanba hakarak atu aumenta ba litánia santu sira-nian. Maibé tanba Padre Titus Brandsma nu’udar mártir modernu ne’ebé laiha komparasaun. Nia moris tuir fiar Evanjellu nian ho radikál. Nia sempre prontu atu tulun ema hotu ne’ebé la baruk atu atravesa dalan moris saserdotál nian. Padre Tito mak sasin ba primazia fiar sarani nian. Imi bele imajina nafatin oinsá Padre Titus sente durante nia viajen terus nian. Iha tinan 1962 Bispu Polónia sira konkorda ho unanimidade kona-ba pedidu ba beatifikasaun Padre Tito nian. Pedidu ne'e asina hosi Sua Eminénsia Karol Wojtyla, Arsebispu Krakow nian ne'ebé ikusmai sei sai Papa João Paulo II. Nia hetan beatifikasaun hosi Amu-Papa João Paulo II iha loron 3 fulan-novembru tinan 1985 no ita selebra nia aniversáriu iha loron 27 Jullu.
Iha loron 25 Novembru 2021, Papa Francisco rekoñese milagre ida ne'ebé atribui ba intersesaun Brandsma nian, ne'ebé "hetan oho tanba ódiu ba fiar", no autoriza Kongregasaun ba Kauza sira Santu nian atu avansa Titus Brandsma nia kauza ba santidade. Iha loron 4 Marsu 2022, konsistóriu papal ida loke dalan ba nia kanonizasaun no marka data ba serimónia kanonizasaun nian ba loron 15 Maiu 2022, hamutuk ho Charles de Foucauld no ema na'in ualu seluk. Iha Domingu, 15 Maiu 2022, iha ema liu 50.000 nia oin hosi mundu tomak, Papa Francisco kanoniza Brandsma no santu na'in neen seluk iha misa ida iha Prasa São Pedro iha Sidade Vatikanu.
Titus Brandsma mate tanba nia brani tebes no konsidera nia núdar profeta ida ne’ebé barani ko’alia nakloke no hato’o lia-loos iha mundu modernu ne’e. Sei hanoin nia tanba nia tenasidade hodi defende direitu umanu báziku sira: liberdade imprensa nian, direitu sira ba edukasaun no sosiedade ida ne'ebé justu ba ema hotu. Hodi hakuak espiritualidade karmelita, nia ho aten-barani no sakrifika duni nia moris no klamar la'ós de'it ba jornalista sira maibé ba ita sarani sira hotu. Ba Na’i nia kreda nia di'ak ho vontade sakrifika nia-an tanba nia hatene katak nia Na’i mós sei hamoos nia ho Bibi-Oan nia raan.
5. Konkluzaun
Sai martir laos buat ida fasil, tanba ita tenke sakrifika buat hotu ne’ebe ita iha ba ema seluk nia diak. Maibé ida-ne'e hatudu ona ho fasil hosi Titus Brandsma. Nia sakrifika ona nia-an ba nia Na’i no ba ema sira ne'ebé nia hadomi. Tanba nia domin boot ba nia Maromak Santissima no Virjem Santa Maria, nia prontu atu mate ba nia maluk sira. Ninia luta boot hodi defende povu nia interese no kontra diskriminasaun sira ne’ebe ikusmai rezulta nia mate iha kampu konsentrasaun Dachau, Alemaña. Maibé nia la mate saugati de’it tanba ho ninia fiar nia iha serteza tebes katak ninia luta definitivamente sei hetan susesu no ida-ne’e loos duni. Ninia tenasidade, korajen, sakrifísiu, sai ona ezemplu klaru no prova ba ema barak iha mundu, li-liu iha joven karmelita sira nia fuan atu sira sai brani liu tan ho espiritu berani hodi sai martir iha sira-nia fiar no brani ko’alia lia-loos maski moris iha perigu no ameasa nia laran.
ORASAUN
Maromak ami Aman, Fonte moris no liberdade nian,
Liuhusi Ita-nia Espíritu Santu, Ita-Boot fó mai ami,
karmelita ida, São Titus Brandsma,
ne'ebé iha espíritu aten-barani ne'ebé boot atu
liberta maluk sira husi terus no torturasaun kruél.
Haraik mai ami mós Espíritu hanesan ne'e
atu rejeita kooperasaun oioin ne'ebé sala no la loos,
atu nunee ami bele nafatin fo sasin
kona-ba Ita-boot nia prezensa iha ne'ebé de'it ami iha.
Ami husu liuhusi Kristu ami-nia Maromak. AMEN
Bibliografi:
Slatery, Peter. Sumber-sumber karmel. Penerj. E. Siswanto. Malang:Dioma, 1993.
Brandsma, Titus. The beauty of carmel. New York: Scapular Press, 1955.
Rees, Joseph. Titus Brandsma A modern martyr. London: Sidwick & Jackson Limited,1971.
https://en.wikipedia.org/wiki/Titus_Brandsma
Tidak ada komentar:
Posting Komentar